منحوس في الغربة ... جزء 1

منحوس في الغربة ... جزء 1

اليوم الاول – يوم الوصول –

انا: سلامو عليكم
الموظف: وعليكم السلام .... نعم يا سيدى

انا: الله ينعم على سيادتك (مع ابتسامة عريضة – من الودن للودن)
الموظف: قصر يا استاذ عاوز حاجة

انا: لا والله بس اصل انا زى ما تقول كده سيادتك لسه واصل من مصر حالااااا
الموظف: اهلا وسهلا يا سيدى .... والمطلوب؟؟ ( مع تكشيرة خشبية من النوع الابلاكاش)

انا: لاء سيادتك مش مطلوب اى حاجة بس انا مش عارف ايه اللى المفروض اعمله اصلا
الموظف: طب استنى بره لحد ما ابقى اندهلك

انا: ماشى يا استاذ (وانا ببصله بصه كان نفسى تكون مترليوز تخرمله قرعته دى)

وبعد ساعة

الموظف: انت يا استاذ
انت يا اخ
يا عم انت يا اللى لابسلى بدلة ومتانتك اوى
انا: نعم – انا يا فندم – وانا طبعا سامع من اول ندهة وكل علامات الطفولة فجاة اترسمت على خلقتى مع نظرة بلهاء تجنن

الموظف: هو فى غيرك فى المكتب يا بنى (وهو بيعض على سنانه) شكله هايعضنى
انا: معلش بقه حضرتك عارف ان لسه جاى من مصـ ..

الموظف: شششششش انت بتتكلم كتير كده ليه فين اوراقك
انا: اوراق ايه بالظبط؟ - مع نفس النظرة البلهاء اياها -

الموظف: كل ورقك يا بيه جواز سفرك , تصريح الدخول , شهادتك
اوراقك كلهااااااااااااااااااااااااااااااااااااااااااااااااااااا
انا: طيب طيب ثوانى اجيبها من بره - ايه يا عم انت بتكلم واحد اطرش ادى اوراقى اهى اتفضلللللللللللللللللل

الموظف: امال فين عقد العمل يا بيه
انا: عقد ايه يا بيه؟ احنا فى بيننا عقود برضه؟ كلمة سعادتك عقد هعهعهعهعهع

الموظف: احنا هانهزرررر هنا مفيش هزاااااااااااااااااااار ..... مش عارف مين اللى اقنعه انى وقعت على ودنى وانا صغير
انا: خلاص يا عم الشرس (دى فى سرى طبعاً) ادى البتاع اهو قصدى العقد اهو اتفضلللللللل

الموظف: اه كده تمام – تمام وهو بيراجع الاواراق
الموظف: انت لسه واقف هنا بتعمل ايه؟
انا: امال اروح فين يعنى استنى فى الاسانسير ولا فين؟ وانا كنت خلاص جبت اخرى

الموظف: لا يا ابو دم خفيف استنى بره على ما اندهلك تانى
انا: حاضررررررررر مش عارف انا ده جايبينه من انهى حديقة حيوانات ( طبعا وانا ببرطم )

الموظف: انت بتقول ايه
انا: مبقولش حاجة الحمام منييييييييييييييييييييييين عاوز اصفرررررررررررررر

يتبع.....

منحوس في الغربة ... جزء 2

~*¤®§(*§(الجزء الثاني) §*)§®¤*~

وبعد ساعة تانية من القعدة المملة وانا عمال اطرقع فى صوابعى
وابص للكائن الغريب اللى قاعد جوه

- انت يا بنىىىىىىىى
انت يا استاااااااااااااذ
-انا: وبكل برود الدنيا رديت....... نعم؟

-الموظف: تعالى يا ابنى - هايعمل فيها ابويا بقه -
-انا: طيب وانا بجزززززززز على سنانى
افندم سيادتك - وطبعا اصفر ابتسامة فى الكون مرسومة على خلقتى -

مد ايده بكذا ورقة وقال......
-الكائن البشرى: اتفضل امضى على دول.. وبسرعة
-انا: امضى على ايه... وليه بسرعة؟ - وانا مش فار يلعب فى عبى دا كلب بيلعب فى عبى -

- الموظف الرزل: امضى وخلاص وبطل الفلسفة فى كل حاجة كده من اولها
طبعا نفضتله تماما وانا بقرا الاوراق اللى ادهالى وكل شوية اطقطق ببقى
وعنيا هاتخرج على صدرى الله الله ايه ده ؟؟؟؟؟؟؟؟؟
ووقف شعر راسى
وعرقت زى ما اكون جاى من مصر جرى
وسالته: ايه ده بقه ان شاء الله ؟؟؟؟؟؟؟؟؟؟؟؟

كان رد البيه:
- امضى على انت قريته و خلصنى
- انا: ازاى امضى دا ايه ده اصلا ؟؟؟؟؟؟؟
دا عقد تانى غير اللى انا جاى بيه من مصر
دا مكتوب فيه ان مرتبى 35 دينار...... وانا العقد اللى معايا بيقول 100 بتااااااااااااع
فى 65 دينار حصلهم حالة شفط مفاجئ
وكمان بيقول ان عدد ساعات شغلى 12 ساعة
و من غير اى اجازات اسبوعية او شهرية او حتى فى الاعياد
هو ايه دا يا عم انا جاى اشتغل حمار ولا ايه ؟؟؟؟؟؟؟؟؟

قالى: انا مش فاضى للكلام الفارغ ده بتاع كل واحد يجى جديد زيك
وبدا يعض على سنانه و هو بيتكلم........
و لو مش عاجبك كلامى فا الطيارة اللى انت جاى فيها لسه بتغير زيت فى المطار

(عمل فيها ميكانيكى طيارات حضرته) - بيروش سيادته عم الكوميدى -
تقدر تلحقها وهيا راجعة (دا على اساس انها بتحمل بالنفر مثلا خط المنصورة - الكويت)

وهنا بقه كان البرج اللى فاضل فى بقايا عقلى طار يا حبيبى طار
ونسيت كل اصول معاملة البنى ادمين - وانا موقف حواجبى وبسند على المكتب باديا الاتنين
وبصرخ زى ما بكون بكلم واحد فى قارة تانية
يا استاذ انا مش هامضى على التهريج ده مش ماضىىىىىىىىىىىى
وانا حاطط فى دماغى انه هايتهز بقه ويخاف ويقول مثلا دا اختبار مثلا ولا حاجة

راح قايم سيادته بعد ما قلع الكوباية اللى متنكرة فى شكل نضارة من على وشه
وقااااااااااااااااااااااااااام من على ا لكرسى (عرفت ساعتها قد ايه انا قصير)
وراح خاطف الورق من ايدى وهو بيبرق (ساعتها حسيت انى عاوز اصفر بجد)
اسمع يا شاطر ان كنت هاتمضى طلع قلمك وامضى مش هاتمضى ورينى جمال خطوتك
اطلع برهههههههههههههههههههههههه (طردنى يعنى.......ايه مستغربين على ايه ؟)

طلعت بره وانا قاعد اخباط اخماس واسداس وارباع وكل حاجة بتتخبط فى بعضها
طب هاعمل ايه دلوقتى يا ربى ؟؟؟؟؟؟؟؟
ما هو ان لو ممضيتش زى ما بيقول هارجع مصر
ارجع مصر تانى ؟؟؟؟؟ يا لهوىىىىىىىىىىىىى
طب ازاى والفلوس اللى انا مستلفها عشان اجى بيها دى هارجعها ازااااااااااااااااااااى؟؟؟؟؟
والعربية الـ 28 اللى كنت بحلم بيها تنك اوى انا
هيا دى اللى اسمها ورطة يا ابو هيثم ولا ايه
وفضلت اكلم نفسى زى الاهبل.... اتنصب عليك يا معلم وعاملى فيها مفتح ومقطع السمكة وديلها
اديك لا طولت السمكة ولا حتى شوكها.............. ماشى يا بنى ادمين
امال لو مكنش مصرى زيى كان عمل فيا ايه
ماشى يا بشرررررررررررررر

فضلت افكر وانا عمال ابصله وهو يبرقلى من ورا ازاز المكتب بكل رزالة (ماشى يا عم ذكى رستم)
و اخيرا سلمت امرى لله وقمت و دخلت المكتب بكل احترام (احم احم)
-انا: فين العقد يا بيه ؟؟ وانا باتمنى انى اقلب على قنبلة تنفجر فى وشه

-النطع: امسك يا مفتح وعلى وشه ابتسامة ديناصور عنده بواسير
-انا: مفتح يا غتت - فى سرى طبعاااااااااااا -
ومضيت وانا عاوز ابرم الورقه وارشقها فى بقه اللى بيفكرنى بالبلاعة اللى على اول شارعنا
دلوقتى ادينى مضيت يا ترى بقه فى سكن زى ما قالولنا فى مصر قبل ما اجى ولا ألحق الجوامع قبل ما تقفل

- الموظف الغتت: جوامع (بيقولها وهو قرفان اوى)
لا يا اخويا هانوديك سكن الشركة بتاع الموظفين (بصراحة كان بيقولها زى ما يكون بيقولى هاوديك جوانتانمو)

وفعلا اتصل بشخص تانى وقاله ودى الاخ ده على السكن اللى فى المهبولة

- انا: فين سيادتك ؟؟؟؟ وطبعا بدات كل معالم البلاهة تبان على وشى
الزفت الموظف: المهبولةةةةةةةةةةةةةةةةةةةةةةة وهو بيسمع كل سكان الكويت تقريبا

وانا ماشى قولته: ممكن سؤال؟؟
الموظف الرزل: اسال يا سيدى

- انا: انت مين اقنع سيادتك انى اطرشششششششش
الموظف الرزل: برهههههههههههههه

- ودى كانت تانى طردة فى اليوم الاغبر ده –

يتبع.....

منحوس في الغربة ... جزء 3

~*¤®§(*§(الجزء الثالث) §*)§®¤*~

فى عربية الافندى اللى هايوصلنا لجوانتانامو اا قصدى السكن مع انى بعد كده اتاكدت ان الفرق مش كبير اوى
الظاهر ان اللى بيوصلنا ده كان قرفان اوى من ابو فصادة اللى كان صايدنى من شوية وطبعا القرف ده اكتشفته من معاملة الافندى
اللى ابتدى الحوار بالشكل ده.......

-الظريف: البهوات اسمها ايه ان شاء الله؟
- انا اسمى عبد الرحيم الجرشى (القرشى بس بالصعيدى)
-الظريف: منين يا جرشى
- من سوهاج يا بيه

- الظريف: وبلدينا اسمه ايه؟
- وانا اسمى هيثم الشاعر دا لو مش يضايقك او ممنوع
- الظريف: لا يا اخويا مايضايقنيش
- الظريف: انت قريب عايدة الشاعر هعهعهعهعهعهعهعهع (بيستظرف طبعا سليل عائلات الطحش).
- انا: بصراحة مش عارف يمكن....... بس انت شايفنى جاى وفى ايدى طبلة ولا ايه؟ وركبتله الوش الجبس وقتى
-الظريف: وانت منين بقه يا عم الفنان؟
- من المنصورة يا................ ولا بلاش

- الظريف: والاخ اسمه ايه؟ (مش عارف ايه حصة التعارف دى؟)
- السعيد المتولى احمد فاروق المتولى (خلاص يا عم دى كلها اسمين وهاتوصلنا لاصلك الفرعونى)

-الظريف: وانت كنت شغال ايه بقه ان شاء الله يا فنان؟ دا بيكلمنى انا؟
- اولا ايه حكاية الفنان دى هو انا واقف على طراطيف صوابعى وبلعب باليه؟
ولا ايه عالم سمسم اللى انا واقع فيه ده؟
ثانيا انا كنت شغال فى شركة كمبيوتر
- الظريف: وانت مؤهلك ايه بقه ان شاء الله بالصلاة على النبى؟
- بكالريوس تربية بالصلاة على النبى، قسم اذكار المساء نياهاهاهاهاهاهاهاها
- دمهم خفيف اوى بتوع المنصورة دول وهو بيعض على سنانه هايفرقع من كتر الضحك اللى ضحكناه كلنا

وباقى الطريق مسمعناش صوته تانى والحمد لله لحد ما لقينا نفسنا فجاة فى مكان غريب خير اللهم اجعله خير
ضلمة جداااااا والطريق طالع نازل ساعتها عرفت يعنى ايه الوحدة العربية فى تكسير الشوارع
وطبعا كنا قاعدين فى العربية ولا اكننا راكبين مراجيح المولد
المهم وقفنا قدام عمارة كبيييييييييييرة
ومن هنا بدا مسلسل لم ينتهى لحد دلوقتى
دخلنا العمارة فى شقة فى الدور الارضى وواحد قاعد هايتخنق من الكرش اللى طالع لحد رقبته
كانت اول مرة اكلم واحد ويرد عليا من بطنه
المهم قولتله احنا لسه جايين جداد من مصر وكنا فى الشركـ.............

ابو كرش: ايوة ايوة عارف
-محدش عاوزنى اكمل كلامى ابدااااااااااااااا
ابو كرش: حمد لله على السلامة
-غريبة اول واحد يقولهالنا!
ابو كرش: فين هيثم الشاعر؟
انا انا فرحان اوى ان فى حد عارفنى
ايه هامضى على حاجة تانية؟؟
ضحك اوى حضرته وقالى اه طبعا امال ايه..... (طبعا اتسمرت مكانى)
-ابو كرش: امضى على وصل استلام لملاية السرير والمخدة !!!!!!!!!!!!!!!
- يا جدعان حد يروحنى انا اتخنقت خلاااااااااااااااااااااص
ملاية ايه سيادتك؟ انا معايا حاجتى الشخصية
-ابو كرش: لا يا حبيبى لازم تستلمها وتمضى على استلامها وبعد كده تقدر تولع فيها وتتدفى عليها
- ماشى يا عم هيا جت على الملاية وانا فاكر بقه انه وصل استلام عادى
لقيت الافندى عاوزنى امضى على وصل ومكتوب فيه ان انا استلمت اغراض بقيمة 30 دينار واتعهد بتوريدها فى حالة الفقد او التلف !!!!!
يا دى الليلة اللى مش عاوزة تخلص هو ايه اللى بـ 30 دينار؟؟؟؟؟؟؟؟؟
الحاجات الغريبة دى بـ 30 دينار يعنى بـ 600 جنيه مصرىىىىىى؟؟؟
هو انا جاى اتجوز عندكم يا جدعاااااااااااااااااااااان (خلاص بقه كان نفسى اعيططططططططططط)
-ابو كرش: هو ده القانون مش هاتمضى شوفلك سكن تانى وخلصنىىىىىىى
يا بنى هنا مفيش اعتراضات انت لسه جاى وهاتتعب لو مشيت بالنظام ده
- وانا مش فاهم انا عملت ايه غريب لحد دلوقتى اصلا --
- مضيت كالعادة وانا حاطط فى بقى جوز جزم مقاس 42
-انا: فين بقه المكان اللى هاتحبسونى فيه عشان انا بقالى يومين منمتشششششش وتعباااااان
-ابو كرش: الدور الخامس
- شكرا يا استاذ......... صحيح اسم سيادتك ايه؟
-ابو كرش: انا عمك سلامة ابو الخير (وهو مبتهج جدا من اسمه حسسنى ان اسمه تامر مثلا)
-انا: انا كان ليا عم والله يرحمه بقه
هو انت ورثت منه العمامة ولا ايه؟ (دا كان مجرد مزاح عادى جدااااااااا)
بس الظاهر ان ده من اكبر الاخطاء فى شركة الوش الاسمنتى دى لانه كان تقريبا هايحدفنى بالدوسيه اللى فى ايده
-ابو كرش: على فكرة.....................
- نعم يا عمى سلامة؟
- وبكل حب وبكل ود وبكل رومانسية قالى الاسانسير عطلان
نعمممممممممممممممممممممممم؟؟

طلعت الخامس وانا شايل شنطى لما كنت هامووووووت وانا اصلا متغاااااااااااظ من كل حاجة
المعاملة اللى باينه من اولها، والعقد اللى اتغير، والملاية اللى انا لبستها فى الاونطة والـ 5 ادوار اللى طلعتهم والشنط على قلبى
ماشى يا كويتتتتتتتتتتتتتتتتتتتتتتتتتتتتتتتتت بس برضه مش هاتقفل اما اشوف اخرتها ايييييييييييييه
واخيرااااااااااااا زست قصدى الشقة الرهيبة

ومن هنا بقه بدات المهزلة الاخيرة فى اليوم اللظيظ جدا ده
اولا لقيت ان الشقة 3 زنازين يوووووووه قصدى 3 غرف
ثانيا بقه الاوضه اللى انا هاشرف فيها كام سرير يا حبايبى يا حلوين؟؟؟؟
ابعت اجابتك على صندوق الزبالة قصدى على صندوق بريد 2233223322
الاجابة بقه <<<<<<<<<<< 6 سراير؟؟؟؟؟؟؟؟
يا خرابىىىىىىىىىىىىىىىىىىى (دا كان رد فعلى الاولانى بس)

بس مش دى المشكلة
المشكلة يا سادة انى كنت الفرد رقم 8
ازاى طيب يا بشر هانام فين؟؟؟؟؟ على الارض؟؟؟؟؟؟؟؟؟؟؟؟
طب ليييييييييييييييييييييييييييييييييييييييه؟؟؟؟؟؟؟
هو انا مش برضه لسه شايل لقب بنى ادم؟؟؟؟؟
ولا انا سيبتها على باب المطار فى مصر؟؟؟؟؟؟

بجد هنا بقه عينى دمعت ومش قادر بجد استحمل كمية الصدمات ومن غير ما حد يتريق
حسيت انى اتخنقت جدا وانى لوحدى اوىىىىى ومفيش اى حاجة مبشرة لحد دلوقتى
وكمان لسه متصلتش بالبيت عشان اطمن اهلى اقولهم انى وصلت وان الطيارة للاسف موقعتش
وكمان هانام على الارض؟؟؟ دا ايه معاملة الحشرات اللى انا باتعاملها دى؟
والله لا انزل لـ برميل الطرشى اللى عاملى فيها مشرف السكن ده

وبعد مداولات وحوارات وزعيييييييييييييق
وانا مصمم انى مش هانام على الارض وافق البيه مدير السجن انه يودينى اوضه تانية فى نفس الشقة
ودخلت الاوضة اللى كان ليه فيها سرير لوحدى (شوفتو الاملة اللى انا فيها)
واخيرا جاتلى فرصة عظيمة جدااااااااااااااااااااا
لحاجة انا كنت هاموت واعملها
كان هايجرالى حاجة واعملها
وهو ده وقتها
جنون بجنون
لازم انفذ اللى فى دماغى
عليا وعلى اعدائىىىىىىىىىىىىىىىى

خلعت الجزمةةةةةةةةةةةةةةةةةةةةة

(المساحة دى متروكة لخيال القارئ او بالاصح لمناخيره)
اعمل ايه 20 ساعة وهيا محشورة فى رجلى لما جالى استبحس

الباقى بقه اكمله مرة تانية

يتبع.....

منحوس في الغربة ... جزء 4

~*¤®§(*§(الجزء الرابع) §*)§®¤*~

واخيرا انا بغير هدومى بعد يوم طوييييييييييل
كنت حاسس انى هاموت بالهدوم دى زى ما تكون لزقت فى جلدى
واهم حاجة انى كنت قلعت الجزمة وبعد دش فى اللذيذ
طبعا كنت جعان جدااااااااااااااااا عادى يعنى بقه
وبما انى معرفش اى حاجة فى المنطقة المقطوعة دى
كان من الطبيعى انى اسال واحد من الشباب اللى معايا فى الغرفة وكان الحوار كالتالى:

انا: قولولى يا شباب لو سمحتم هو لو انا حبيت اجيب اكل فين اقرب سوبر ماركت هنا؟؟
واحد من الشباب: مفيش هنا سوبر ماركت انت تروح البجالة يا ابن عمى (البجالة = البقالة بس باللهجة الصعيدية المحلية)

انا: وهيا فين البجالة يا ابن خالى
واحد من الشباب: شوف يا سيدى - زى ما يكون هايوريهالى فى التليفزيون الاول -
انت هاتنزل تحت وتمشى شمال وبعد كده يمين فى شمال وتمشى على طوووووووووووووووووول وبعد كده تدخل شماااااااااااااااااااااااااااااال هتلاقى الطريق فى وشك خبط لزج (خبط لزق)
فى وشى يا................. عم المحترم

انا: ولما الاقى الطريق اعمل ايه ما تكمل هاقعد على الرصيف اشحت مثلا؟؟؟؟
ولا ارمى نفسى تحت عربية واخلص من فيلم ابن بطوطة اللى انت معيشنى فيه ده؟؟؟
واحد من الشباب: لا يا ابو العم هاتعدى الطريج طبعا - بسم الله ما شاء الله نبيه -

انا: وبعدين؟؟؟؟ هلاقى البقالة نازلة عليا من السما يعنى ولا ايييييييييييييييييييييييييييييه؟؟؟
واحد من الشباب: انت هاتهزر يا بلدينا كتير وانا ماليش فى المسخرة دى

انا: خلاص خلاص يا عم انا بس بهزر معاك خليك حلو امال دا احنا هانبقى زمايل فى صندوق الزبالة ده أأأ قصدى الغرفة

نزلت الـ 5 ادوار الظراف وانا بحاول احفظ الخريطة بتاعت السيد ابن بطوطة عبد التواب اللى فوق ده
ووصلت بحمد لله بعد 30 دقيقة بالتمام والكمال - الروش واصفلى بقالة على الحدود مع السعودية -
دخلت البقالة وانا هاين عليا اكل هدومى
ومن هنا بقه بدا اول فصل من فصول الغباء الغير متعمد بسبب اللغة
لان كل اللى شغالين فى البقالات هنا من الجنسيات الاسيوية (هنود - بنجلاديشيين - سيريلانكيين) ودول بقه يا بيتكلموا انجليزى اللى كان فى الوقت ده زى اليابانى بالنسبالى بالظبط
او بيتكلموا عربى بس باللهجة الكوبيته والتى تختلف شكلا وموضوعا عن اللهجة المصرية بتاعتنا وكان الموقف الاول كالتالى

انا: سلامو عليكم
الهندى: وعليكم السلام صديق كل الناس هنا بالنسبالهم صديق

اشطة اشطة دا رد عليا السلام ونسيت ان فيهم مسلمين كتييييير
انا: انت بتتكلم عربى؟ مساء الورد يا عسل دخلة شعبى من بتوعنا بقه
الهندى: شنو -- دى كانت الكلمة اللى قالها واللى انا ساعتها مكنتش فاهمها طبعا

انا: ليه كده ما انت كنت حلو قلبت هندى ليه ولا عشان شايف شعرى اسود وناعم هاتدينى وش الاميتابتشانى
الهندى: شنو -- نفس الكلمة بس بعصبية شوية

انا: انا مش عارف انت بتقول ايه بس ممكن تكلمنى عربى لو سمحت انا مش بتكلم هندى
الهندى: انا ما يتكلم هندى سوا سوا انا فى كلام اربى زين ----> الترجمة: انا مش بتكلم هندى معاك انا بتكلم عربى كويس

انا: انا مش فاهم منك حاجة بس مش قضيتنا
ادينى كيس عيش وعلبة جبنة ولانشون لو سمحت
الهندى: شنو -- المرة دى بقه بعصبية جامدة وهو بيبرقلى وبيبص للاخ الهندى التانى اللى واقف معاه
وكان شكله باين عليه الاشمئزاز جدا زى ما يكون هايرجع عليا

انا: ايه يا عم عاوزنى امضيلك على حاجة انت كمان ما هو انا جاى هنا امضى وبس باين
انا مش فاهم انت بتقول ايه ادينى عيش وجبنة فى ليلتك الهباب دى خلينى امشى
الهندى: عيش؟

انا: اسم الله عليك يا امووووووووووور ايوة عيش
الهندى: هادا عيش........ وهو بيشاور على شوال جنب باب المحل

انا: هادا ايه؟؟؟؟؟ انت عاين العيش فى شوال على الارض كده ولا ايه؟
دا على اساس التمويه مثلا ولا ايه ظروفك
ولا فجاة بقه من الكحوليات ومخبيه انت من المباحث اه يا عفريت طبعا كل ده انا بكلم نفسى زى الاهبل بالظبط
المهم انى برضه زى العبيط روحت للشوال على اساس انى الاقى عيش بفتح الشوال لقيت رز

انا: ايه ده يا عم الكوميدى انت بتروش؟؟؟ مفيش هنا عيش
الهندى: هادا عيش وهو بيشاور برضه على نفس الشوال

انا: يا عم انت اهبل؟؟؟؟ هادا الى انت بتشاور عليه ده يبقى رز مش عيش
الهندى: شنو -- دى للمرة التالتة وبكده استنفد كل فرصه فى انى امسك اعصابى

انا: هو انت كل ما تتزنق هاتقولى شنو بتاعتك دى طبعا بقول الكلام ده وانا بجعر
ما تكلمنى عربى ياد انت ياد عليا النعمة البتاعة اللى انت عما لتقولها دى لو طلعت شتيمة
لاطلع فيك كل اللى شوفته لحد دلوقتى
انا اجعر وهو يبصلى وبيتكلم كلام انا مش فاهمه وعنيا بتدور على اى عيش من اى نوع عشان اقوله زى ده يا اهطل

واثناء حوار الطرش ده
دخل المنقذ العجيب
شخصية غير متوقعة على الاطلاق
زى ما يكون كان لازق فى شبشبى وانا نازل من السكن
استاااااااااااااااااااااااذ سلامة ابو كرش family size
(بتاع ملاية السرير فاكرينه؟؟؟)

ابو كرش: انت لحقت تيجى هنا يا بتاع المنصورة
انا: مش وقت عنصرية الله يكرمك والحقنى فى الورطة الهابلة اللى انا فيها دى

ابو كرش: وهو بيضحك - شبه طبق الجيلى كل جسمه بيضحك معاه بس من فوق لتحت -
ورطة ايه انت لسه يابنى بقالك كام ساعة فى البلد وبتقولى ورطة
انا: انا بقالى هنا نص ساعة بفهم فى المخلوق ده انى عاوز عيش ولسه كمان موصلتش لمرحلة الجبنة ولا انا فاهمه ولا هو فاهمنى

ابو كرش: طب انا هاجيبلك
انا: اشطة يا عم سلامة يا ساحر انت يا حلو

ابو كرش: وله لم لسانك ياد والله اسيبك وامشى
انا: خلاص يا عم هو انتم هنا ضد الهزار ولا اللى بيهزر بيجيله هرش؟؟؟؟؟؟؟؟؟؟؟؟؟
انا مش هاهزر تانى معاك يا عم طالما بتزعل

ابو كرش: خلاص خلصنا،,,, وبص للهندى وقاله:
((هاد الريال يبى خبز وجبون، هو ما يعرف ايشلون كلام، هو نفر جديد داخل بلاد))
انا:فى ذهول تاااااااااااام وتتنيحة من النوع الخشبى الجيد
انت بتقول ايه يا عم سلامة؟؟؟؟؟؟؟؟؟؟؟؟؟؟؟؟؟؟؟

ابو كرش: بقوله انك عاوز خبز وجبنة وانك مش عارف تكلمه عشان انت لسه جاى جديد
انا: يا رااااااااااااااااااااااااااجل؟؟؟؟؟؟؟؟؟؟؟
امال كان بيشاورلى على الرز ليه كل ما اقوله انا عاوز عيش

ابو كرش: ما هو كلمة العيش دى بتتقال هنا على الرز
- لا تعلييييييييييييييييق -
انا: وايه الريال دى مش عملة الكويت الدينار برضه ولا انتم غيرتوها فى العقد هيا كمان وانا بقولها من تحت لتحت طبعا

ابو كرش جنان: الريال دى يعنى الراجل هنا وبطل لماضة بقه شكلك هاتكون متعب اوى
انا: متعب ايه بس يا عم سلامة هو انا الجناينى بتاعكم ولا ايه؟؟؟
ويعنى ايه بقه ((شنو)) اللى كل ما كنت ازعقله يقولها دى بقــه

ضحك تانى زى ما يكون شغال بالفيبريشن وقال ان شنو دى كلمة بتتقال لما يكون مش فاهم حاجة او مستغرب من حاجة
زى عندنا كده ايه انت بتقول ايه؟؟؟؟
انا: اااااااااااااااااااه ده المفروض عربى يا حاج؟؟

ايوة يا سيدى انا مروح هاتيجى معايا ولا رايح فى حتة؟؟
انا: شنووووووووووووو اشطة يابا؟؟؟
طبعا مبرشط مع معاليك مش انت جاى بالعربية برضه وانا فى سرى: اكيد ما هو لو جه ماشى كان زمانه متحرك من العصر على ما يوصل

ابو كرش: طب اطلع شكلك كده بلسانين
انا: ماشى يا عمى دا على اساس انى افعى بقه وكده
اديك انت اللى بتهزر اهو وبتفرقع كلام وانا مزعلتش اهو ولا حاجة افتكرها بقه

وطبعا ركبت معاه لحد المعتقل قصدى السكننننننننننن

وبكده انتهى اليوم الاول اللى كان اطول يوم واسود يوم فى عمرى

يتبع.....

منحوس في الغربة ... جزء 5

~*¤®§(*§(الجزء الخامس) §*)§®¤*~

المكان: غرفة معفنة شبه علبة السردين وريحتها تقرففففففففففف
- بس برضه نايم -

الزمان: الساعة 4 فجرااااااااااااااااااااااااااا

الحدث: انا نايم بعد اليوم السعيد جدا اللى قضيته امبارح وطبعا نايم وانا واخد وضع الاموات فى النوم

وبحلم حلم لسه تفاصيله فى دماغى لحد النهاردة ومستحيل هاتضيع من ذاكرتى ابدااااااااااا

بيوم سفرى وامى الدموع مالية عنيها وبتنزل على خدودها من سكات
وابويا اللى اول مرة فى حياتى اشوف عنيه مدمعة وبيبصلى بشكل غريب وهو بيودعنى فى المطار
واخواتى اللى ماسكين فى ايدى وبيسلموا عليا
وخطيبتى اللى شفت فى عنيها نظرة مستحيييييييييييل انساها او انسى معناها
(((نظرة استنى متمشيش،,,, والحوار الكبييييييييير اللى دار بيننا من غير ما نفتح بقنا
نظرة متنسانيش، متخليش الغربة تاخدك منى
وهيا عارفة انها الامل اللى انا عايش عشان احققه
نظرتى ليها اللى بتقولها استنينى يا حلم عمرى الغالى)))
حلم بيوعجنى كل مرة احلم بيه
وفى وسط الاحلام دى فى صوت بينده عليا من بعيييييييييييييييييييييييييييد اوى
وانا مش عاوز ارد اصلا

لسه حاضن امى وبقولها ادعيلى يا امى محتاج دعواتك اوى
((هيثااااااااااااااااااااااااااااااااااااااااااااااام))
ابويا وانا ببوس ايده وبقوله يدعيلى
((هيثااااااااااااااااااااااااااااام))
اخواتى وانا بسلم عليهم
((هيثااااااااااااااااااااااااااااااااااااااااااااام))
خطيبتى وانا بسحب ايدى من بين صوابعها وانا متسمر فى الارض
((هيثااااااااااااااااااااااااااااااااااااااااااااااااااااااااااااااام))

- انت يا جدع انت اصحى بقه
- انت يا بنى ادم
- يا هيثاااااااااااااام
انا: ايه فى ايه؟،,,,, مين؟،,,, عاوز ايه؟
ايه اللى حصل؟ فين؟
انا: انت مين؟؟؟؟؟؟؟؟؟؟؟؟

صوت وحششششش: قوم بقه يا اخى قرفتنى
فتحت عينى على حاجة كبيرة اوى ومدورة وفوقها كورة بتلمععععععععع
هو خير اللهم اجعله خير.... الحلم قلب على خيال علمى ولا ايه؟
مش دى برضه كورة الزمن ولا دا ايه؟؟؟

ايوة خير انت مين؟؟؟؟ وعاوز ايه؟؟؟ وانا مش شايف حاجة عشان عاوز اناااااااااااااااااااااااااااام
نفس الصوت الوحشششش: قوم يا بنى انا بصحيك بقالى ساعة،,,, هو انا مراتك؟؟؟؟؟
انا: ايه ده هو انت سلامة؟؟؟؟؟؟؟؟؟؟؟ دا ايه الكوابيس دى يا ربى
سلامة الغتت: ايوة يا سيدى سلامة اللى قرف منك من اول يوم
انا: ايه يا ربى الزلزال اللى انا قايم عليه ده
-- خير يا استاذ سلامة -- (وانا اصلا مش شايف قدامى لانى يا دوب نايم الساعة 12 بالليل)
هيا الساعة كام؟؟؟؟
ابو كرش: الساعة 4 يا سيدى قوم بقه يلا عشان عندك دوام
انا: دواء؟؟؟؟؟؟؟ ايه دواء ده مين اللى عيان؟؟
ابو كرش: عيان؟ ودواء؟؟
-- انت مين اللى باعتك هنا يا هيثم -- (وهو مضيق فى عينه اوى زى ما يكون بيكتشفنى مثلا)
انا: يعنى انت مصحينى الساعى 4 الفجر عشان تستفسر عن اسباب هجرة الشباب لدول الخليج فى ايه يا استاذ سلامة؟؟؟
ابو كرش: فى ان انت عندك دوام قوم يلااااااااااااااا
وادى هدومك اهى واعمل حسابك لو الباص مشى وسابك هاتاخدها مواصلات على حسابك
انا: طيب هو الساعة كام دلوقتى نيهاااااااااااااااااااااااااااااااااااااااااااااااااااا (بتمطع عادى يعنى)
ابو كرش: الساعة 4 وربع والباص هايمش كمان نص ساعة يا خلص نفسك
انا: طيب انا قايم اهو بس فى الدنيا كلها شغل الساعة 4 الفجرررررررررررر؟؟؟
هابيع لبن ولا هاصحى العصافير عشان صلاة الفجر -- وانا بجز على سنانى جدااااااااااااااااا
ابو كرش: بكل تناحة...... اه فى شغل دلوقتى عاجبك ولا لاء؟؟؟
يخرب بيت لماضتك،,,, اسمع دى اخر مرة هاصحيك فيها اصلا وهدومك اهى تلبسها وانت نازل
انا: ماشى يا حضرت الصول (طبعا وانا عامل بحواجبى كل الحركات الهندسية)
ابو كرش: متتاخرششششششششششش وهو بيضيق فى عنيه
انا: خلاص يا عم انا قمت اهو وادينى داخل الحمام تحب تيجى معايا تتاكد بنفسك؟؟؟؟
ابو كرش: لا يا لمض انا نازل
انا: انزل يا عم تلاقيك هاتنزل زحلقة على الترابزين عشان توصل

اخدت الدش اللذيذ وصليت الفجر وبدات البس الهدوم اللى جايبها ابو كرش
وهنا كان فى بقه كارثة من نوع اخر....
الهدوم اللى جايبها البيه مستحييييييييييييييييييييييل تكون لنفس الشخص مستحيل بنى ادم واحد اللى هايلبسها
والا هايكون اكبر بنى ادم معوق فى العالم

اولا: القميص ضيق جدااااااااا وكمامه طويلة جداااااااا ازاى انا مش عارف؟؟؟؟
ثانيا: البنطلون بقه واسع جداااااااااااا من الوسط ونازل بضيق جدااااااااااااااااا
متكونش دى الفاشون بتاع الشركة مثلا؟؟؟ استايل الشركة كده مثلا؟؟؟؟
لا اكيد مش كده.......
دا ايه الهدوم العجيبة دى يا ربى،,,, ومفيش وقت انزل لسلامة البطريق عشان اقوله ان الهدوم مش راكبة على بعضها
المهم حشرت نفسى فى القميص ونطيت جوه البنطلون
وطلبت معايا انى ابص فى المراية قبل ما انزل ويا ريتنى ما بصيت
صياد يا جدعان،, مين ده؟؟؟؟،, -- ده السؤال اللى انا سالته لنفسى على نفسى --
كنت عامل زى اللى لبس منطاد وناقصه بس الهوا يسخن تحته ويطير،, ماشى يا سلامة يا تخين
نزلت وانا حاسس انى زى اللى شاحت هدوم اخوه الكبيييييييير (من تحت) واخته الصغيرة (من فوق)
المهم نزلت والقفلة بقه فى اللى جاى..........

سلامة ابو كرش مهرتل اول ما شافنى ضحك تخيلوا انتم بقه لما البطريق ده يضحك عليا يبقى انا فعلا شكلى ايه
قولتله يا فتاح يا كريم هو انت مش اللى جايبلى الهدوم دى انا كنت قستها قبل ما استلمها
ما تعمل معروف وتسيبنى اطلع اغير البلياتشو اللى انا ناطط فيه ده (وفى عينى نظرة استعطاف زى ما اكون بقوله ادينى سندوتش جبنة وحياة ولادك)

ابو كرش: برضه لاء ربنا ما يحرمك من الهبل ابدا يا سلامة يا...........
انا: طب ممكن سؤال؟؟؟؟؟
ابو كرش: اسال وبسرعة اخلص (بيحسسنى انه تباع على ميكروباص فى المنصورة)
انا: ممكن اعرف انا رايح اشتغل فين بالظبط؟؟؟
ابو كرش: فى فندق
انا: طب الفندق ده اسمه ايه؟؟ وهاشتغل انا فيه ايه؟؟؟ وايه نظامه يعنى
ابو كرش: هيثم
انا: بكل براءة،,,, نعم يا استاذ سلامة
ابو كرش: بهدوء غريب زى اللى هايعمل مصيبة على سهوة قالى (ممكن تستنى فى الباص؟؟)
انا بصراحة حسيت بالغدر قولت اقصر ولما اروح الفندق اللى بيقول عليه ده اشوف ايه اللى هايحصل
بس انا لسه مخنوق جدا من الاسترتش اللىانا لابسه على هيئة قميص ده
وكمان بنطلون السندباد ده مخلينى حاسس ان الهوا جاى من كل مكان
وطلعت الباص
وهنا بقه........

اقدر أقولكم إن الحلقة دي خلصت... وأشوفكم المرة الجاية

يتبع.....

منحوس في الغربة ... جزء 6

~*¤®§(*§(الجزء السادس) §*)§®¤*~
~*¤®§(*§(أسامة أبو الحمد)§*)§®¤*~

(- اول يوم طحن وفرم -)
كنا وقفنا عند الاخ (سلامة ابو كرش) وهو بيقولى استنانى فى الباص اللى هايرحلونا فيه قصدى هايوصلنا الفندق اللى هاشتغل فيه طلعت الباص بكل تفاؤل وانا ببتدى اول يوم ليا فى الغربة بقه

انا: سلامو عليكم يا شباب
الشباب: وعليكم السلام دا كان رد من واحد نايم فى اخر الباااااااااااااااااااااااااااااااص
انا: طب فين يا جماعة الناس اللى رايحة الفندق
واحد تقريبا مسطول: خير يا عم
انا: خير ان شاء الله اصل انا رايح معاهم
نفس المسطول: رايح فين هيا رحلة (اه دا شكله مصدق انه مهم ولا ايه)
انا: لاء رحلة ايه يا راجل وانا بالبراشوت اللى انا لابسه ده بس دا الاستاذ سلامة اللى قالى انى هاروح الفندق
المسطول: طب اقعد لما نوصل ابقى انزل ورايا (دا عايشها اوى الكابتن بس ماشى)

وصلنا الفندق بالسلامة ولاحظت الاتى:
ان زمايلنا اللى كانوا شغالين باليل كانوا واقفين على الباب بره فى الشارع والجو قالب على ثلاجة 120 قدم وكمان شكلهم زى ذئاب الجبل كل واحد منهم رافع الجاكت ولابس كوفيه ومقنفد على نفسه اوى انا قلبى اتخطف بصراحة لان ده معناه انى هاقف مكانهم كده - يا صباح المرمطة هيا دى مكاتب الاستقبال اللى هانشتغل فيها زى ما قالولنا فى مصر؟؟
نزلنا من الباص والباص مشى ولقيت نفسى مع اتنين غيرى الكابتن المسطول وواحد تانى شكله كده اسيوى (ودى كانت اول مرة اعرف ان معانا فى الشركة اسيويين)
طبعا الكابتن المسطول ده كان بيتصرف بقيادية اوى اول ما نزل كالتالى: عدل هدومه وشد نفسه اوى وكح حكتين
براكااااااااش جو زير --- go there -- يعنى روح هناك
لقيت الاخ الاسيوى راح جارى جرى على البوابة ووقف ولا اسد قصر النيل، وانا طبعا واقف اتفرج زى الاهبل

بعد سيادة العميد قصدى الزميل بصلى وقالى: انت ايه اللى موقفك كده ما تروح على البوابة الخلفيه يلا وخد معاك جهاز
انا: جهاز ايه وفين البوباة الخلفية دى وهاعمل ايه انا على البوابة انا مش فاهم حاجة
الاخ الظابط: هو انت كنت شغال فين قبل كده
انا: فى شركة كمبيوتر
حضرة الامباشى: شركة كمبيوتر ايه؟؟؟ الشركة مش واخدة اى شركات كمبيوتر كأمن
انا: لا انا كنت شغال فى شركة كمبيوتر فى مصر بكل تلقائية
سيادة المخبر: وانا مالى ومال مصر انا بسالك قبل ما يجيبوك هنا فى الفندق كنت شغال فين؟؟
انا: مكنتش دا اول يوم شغل ليا وعشان كده مش عارف الهوا من العما
حضرة الكومستبل: اااااااااااااااااااااااااااااااااااااااااااااه جديد سيادتك
ااااااااااااااااااااااااااااااااااااااااااااااااااااااااااااااااااه (مش عارف ليه طلبت معاه ينهق لما قولتله انى جديد)
انا: هو عيب انى اكون جديد ولا ايه؟؟ انا ممكن اروح لو وجودى منرفز سيادتك يعنى (وعلى فكرة اللى بيكلمنى ده لابس زيى بالظبط يعنى بالبديهة كده يبقى زميلى بس اقدم منى طبعا)
معالى امين الشرطة: لا يا اخويا ماتمشيش تعالى معايا

دخلنا مكتب مكتوب عليه (الامــــن)
راح سيادته وبكل الاطة قاعد على المكتب وماسك ورقة وقلم وسالنى
اسمك ورقمك وجنسيتك
انا: اسمى هيثم.........الشاعر ورقمى: 010 14.......
البيه المحقق: انت هاتهزر يا بنى رقم هويتك ايه؟؟
انا: اه طبعا بهزر مهزرش ليه ما انا حاسس انى واقع فى فيلم اسماعيل يس فى الكويت، رقم ايه انا اعرف حاجة؟؟؟ بقولك انا جدييييييييييد لسه السوليفان عليا اهو تقولى رقم هويتك وبعدين كل واحد اكلمه يقولى اسمك ايه؟؟ هو انتم تايه منكم حد هنا ولا ايه؟ وبتسالنى عن جنسيتى ليه؟؟؟؟ شايفنى بتكلم ايه؟؟؟ ولا لازم اعلق العلم على قفايا، طبعا انا عمال ارص الكلام ده كله وهو مبرقلى زى ما اكون انا اهنته اكبر اهانة فى تاريخه المهنى كرجل عسكرى له سلطة
رد سيادته بقه وهو بيتكلم ببطء اوى وبيضغط على الحروف اوى (هايفعصها تحت ضروسه الغبى)
اسمع يا كابتن انا هنا بقالى 3 سنين فى الفندق ده ومر عليا زيك كده كتير اوى وان كنت فاكر ان دمك خفيف او صايع تبقى غلطان
وراح واقف من على الكرسى وهو بيقول انا اسامة ابو الحمد والشركة كلها من اولها لاخرها تعرفنى وانت هنا تسمع كلامى وبس انت فاهممممممممممممممممممممممممممم
انا: اسامة مين؟؟؟ ابو الحمد وفرحان اوى امال لو كنت اسامة بن لادن بقه كنت فرقعت عيارين فى الهوا ولا ايه وبعدين بقالك 3 سنين بقالك 5 شهور دى مشكلة شخصية محبش انا اتدخل فيها وبالنسبة لدمى الخفيف والصياعة انا مش هاعلق عليهم عشان مش عاوز ابتدى اول يوم ليا فى البلد دى فى اقسام البوليس وبعدين اللى انا اعرفه ان انت زيك زيى زميلى ملكش اى سلطة عليا وسلامة هو اللى قايلى كده واى كلمة ملهاش لازمة صدقنى هايبقى يومنا مش لطيف بالمرة ماشى يا عم الامور، ورحت شادد كرسى وقاعد بكل بساطة
طبعا المعلم كان هايفرقع وانا قاعد بكل برود وحاطط رجل على رجل، طب اتفضل قوم لما اوريلك شغلك وعلى وشه ابتسامة صفرااااااااااااااااااااااااااااااااااااااااااا ولا اكنه بيضة ارنب

خرجنا بره المكتب وقالى ده يبقى زميلك واسمه (براكاش) - نيبالى -
انا: اسمه ايه تانى؟؟؟؟؟؟؟ وانا علامات الغباء بتشاور عقلها معايا تظهر ولا لاء
اسامة: براكااااااااااااااااااااااااااااااااااااش اقولها تانى براكااااااااااااااااااااااااااااااااااش
انا: خلاص يا عم انت بتحضر عفريت خلاص عرفت ان اسمه بقرة كااااااااااش هههههههههههههههههه
اسامة: طب تعالى يا..... انت اسمك ايه بقه ان شاء الله
انا: قولت الطف الجو بقه شوية انا اخوك هيثم الشاعر ومن المنصورة وانت اسامة ابو الحمد اللى الشركة كلها عارفاك الا انا، انت منين بقه يا عم اسامة؟
اسامة: من السويس
انا: احسن ناس يا مان متزعلش منى من البقين اللى فى المكتب انا لسه جاى جديد وكله عمال يفرم فيا وانا مش فاهم اى حاجة فى السيرك اللى انا واقع فيه ده
اسامة: خلاص محصلش حاجة (برضه بكل تناكة)
انا: ماشى فين بقه شغلى وهاعمل ايه هنا انا مش شايف اى مكاتب استقبال غير اللى احنا كنا قاعدين فيه
اسامة: وانت عاوز الشركة تجيب لسيادتك مكتب استقبال ولا ايه؟؟
انا: اللى انا اعرفه من مصر من قبل ما اجى انى هاشتغل كموظف استقبال فى اى مكان الشركة تودينى فيه
اسامة: هاهاهاهاهاهاهاها نياهاهاهاهاهاهاهاها (دى ضحكة العفريت اللى ضحكها)
انا: حلوة مش كده اقولك واحد تانية فى ايه يا عم انت بتضحك على ايه
- دا اهبل دا ولا ايه -
اسامة: بقه انت بقه فاكر انك هاتشتغل فى مكتب استقبال نيهاهاهاهاهاهاهاهاهاهاهاهاهاهاها
انا: بقولك ايه يا عم الفرحان على الصبح ما تفهمنى فى ايه بالظبط
اسامة: انت يا حبيبى جاى هنا ((سيكيورتى)) يعنى - امن - يعنى هاتقف على بوابة تشوف الداخل والخارج
انا: ملامحى قلبت على طبق صينى مفلطح وحواجبى بقت فى نص دماغى وعنيا كانت بتبرقققق وبقى مفتوح ولسانى مدلدل بره - عبيط عبيط يعنى - ومكنتش قادر انطق ولا كلمة
انا: اسامة...انت بتتكلم بجد؟؟ (وانا صوتى مكسور وواطىىىىى)
اسامة: بكل ثقة ايوة يا سيدى انت مين اللى قالك انك جاى هنا تشتغل موظف استقبال لا حول ولا قوة الا بالله
انا: كمان لا حول ولا قوة الا بالله هو انا اتشليت ولا ايه؟؟؟؟
اسامة: وبدا يتكلم بطريقة افضل شوية (صعبت عليه باين) بص يا هيثم كلنا هنا شغالين هنا كده وهيا الحياة كده معلش استحمل وبكرة ربنا يفرجها
انا: الحياة؟؟؟؟؟ واستحمل؟؟؟؟؟ انا اتنصب عليا بجد ولا ده حلم رخم وهاصحى كمان شوية، يعنى لا المرتب هو المرتب ولا الشغل هو الشغل وكمان 12 ساعة يعنى مفيش وقت اشتغل اى شغل اضافى، طب وال 14 الف جنيه اللى انا سالفهم، والشقة اللى انا المفروض هابنيها عشان اتجوز فيها؟؟؟؟ كل ده بيدور فى دماغى وانا واقف وحاسس ان الدنيا كلها اتكركبت على راسى، يا سوادك يا مهجةةةةةةةةةةةةة
اسامة: انت يا بنى هاتفضل واقف كده يلا خلينى اوريك هاتقف فين، او امسك ده فى ايدك وهو بيدينى جهاز لاسلكى
انا: ايه ده دا لاسلكى حقيقى - وانا بلعب فى الزراير وانا فرحان اوى زى العيل اللى حد اداله لعبة جديدة -
اسامة: انت بتعمل ايييييييييييييييييييييييييييه؟ وهو هايطق من جنابه
انا: ايه يا عم بطل تزعق فى وشى شوية مش ناقصاك وحياة والدك وبعدين هو البتاع ده شغال بجد ولا ايه؟
اسامة: امال لعبة بمناسبة تشريف سيادتك مثلا، طبعا شغال وانت عمال تقلب فى الموجات ولا انت عارف حاجة
انا: خلاص يا عم امين الشرطة هاعمل بيه ايه ده ان شاء الله
اسامة: ده وسيلة اتصال بيننا عشان لما تعوز حاجة او لما احب ابلغك بحاجة
انا: اه يعنى مثلا لو جالى شوية ارهابيين تاييهين اوريهم الطريق وابقى اعرفك على الجهاز عشان تستقبلهم انت على البوابة الاولانية؟؟؟؟ عليا النعمة شكلك بتشتغلنى ولا شغال ولا حاجة
اسامة: متلعبش فى حاجة ولما تحب تتكلم اضغط هنا واتكلم وخلاص
انا: طب ممكن اجرب؟؟؟؟ عشان بس اتاكد انه شغال
اسامة: يا عم انت هاتربيلى الخفيف، الجهاز معاك اهو وانت هاتشيل مسؤليته
انا: طب مش عاوزنى امضيلك عليه ولاحاجة؟؟؟؟؟ ما هو فرح امضاءات
اسامة: لاء بس لو باظ هاتدفع تمنه يا شاطر

كل ده بنتكلم واحنا ماشيين لحد ما وصلنا ورا الفندق ومفيش اى مظهر من مظاهر الحياة، مفيش غير شجر ورمل والبوابة اللى المعلم عاوزنى اقف عليها مقفولة ومصدية وعليها 3 طن تراب

انا: انت عاوزنى اقف هنا؟؟؟؟
اسامة: ااااااااااه
انا: طب ليه دى مقفولة ومصدية هاقف ها اعمل ايه اكلم نفسى مثلا ولا اعد الرمل الى حوالين الفندق الملعون ده؟
اسامة: والله هيا دى التعليمات وده مكانك ولو عوزت حاجة ابقى كلمنى على الجهاز
انا: طب يا عم افرض لو انا حبيت اصفر مثلا اعمل ايه؟ حبيت اصلى مثلاااااااا اكلمك على الجهاز وكل اللى شايل جهاز يعرف انى عاوز اصفررررر
اسامة: اااااااااااااااه
انا: انت مفيش عندك الا اااااااااااااااه دى
(-- انت عندك التهاب فى زورك ولا ايه؟ --)
اسامة: يلا يا بطل بقه خد بالك واوعى تنام

انا بصيت حواليا وللمكان اللى انا واقف فيه والوضع كله على بعضه،
هو فى ايييييييييييييييييه ايه اللى بيحصلى ده هو في اييييييييييييييييه بجد، رمل وصحرا قدامى وانا واقف على بوابة وفى ايدى لاسلكى، لااااااااااااااااااء اكيد انا هاصحى كمان شوية

يتبع

منحوس في الغربة ... جزء 7

~*¤®§(*§(الجزء السابع) §*)§®¤*~
كنا وقفنا لما الاخ المهم - اسامة ابو الحمد - مسؤول الشيفت لما سابنى عند بوابة الحلوانى اقصد بوابة الفندق ومشى ،،، انا فضلت اتلفت حواليا زى الاهبل. وفضلت اسال نفسى......

هو انا يا ربى موعود بالحاجات الغريبة فى حياتى؟
مش هاعيش زى اى انسان طبيعى بقه
بوابة مصدية وعليها تراب ورمل وصحرا
حسيت انى اكيد كمان شوية هايعدى عليا جمل بهودج بقه ويقول هلا بشيخ العرب وانا ممكن استثمر الموقف اللى انا فيه ده واجيبلى كام معزة واسرح بيهم واهو بيزنس برضه
بعد شوية الذهول والبله المرتسم على خلقتى الكريمة سلمت امرى لله وقولت اقعد لما اشوف ايه اللى هايجرالى

طبعا مش هاقولكم على البرد اللى انا كنت فيه وخصوصا مع البراشوط اللى انا لابسه كان الهوا داخلى من كل مكان ومجمدنى
لقيت كرسى بـ3 رجلين كده وشكله كده كان لازم يكون فى متحف من المتاحف اللى بتهتم بادوات العصر البدائى
وطبعا انا معرفتش انه ب 3 رجلين الا بعد ما قعدت ويا ريتنى ما قعدت

هوووووووووووووووووووووووووووب طااااااااااااااااااااااااااااااااااخ آآآآآآآآآآآآآآآآآآآآآآآآآآآآآآآآآآآآآآآآآآآىىىىىىى

هو ده اللى حصل بالظبط
وقعت وقعة محترمة جدا وطبعا نزلت على ضهرى ورجليا لفوق وايديا مفرودة يعنى لعبت باليه فى الوقعة

طبعا بكده بانت كل ملامح اليوم السعيد جدا بدات واترسمت
قمت ونفضت هدومى وبكل هدوء دورت على النضارة لحد مل لقيتها وحطتها على وشى بكل هدووووووووووووء ودورت على اى حاجة اقعد عليها
و ملقيتش غير حجر ظريف زى ما يكون موجود مخصوص لى هايترمى فى الحتة المقطوعة دى

ويا دوب لسه بقعد ويقول يا هادى لقيت البتاع اللى انا معلقه فى البنطلون ده بيخرفش (ايوة البتاع اللى قالولى عليه لاسلكى ده)
انا بصراحة ربنا قلقت قولت هى القيادة العليا شافتنى وانا بقع ولا ايه؟؟؟
دا ايه جو رافت الهجان اللى انا عايش فيه ده يا ربى؟؟
وسمعت صوت غريب بيقولى.......

- معايا يا هيثم؟
انا: ايوة انا هيثم انت مين؟ ولا اكنى خفير فى عزبة العمدة
الصوت: تعالى على الريسبشن بسرعة (مكتب الاستقبال)
انا: انت مين؟
الصوت: تعلاى وبلاش غلبة يلاااااااااااااااااااااااااااااا
انا: طيب بس انا معرفش فين الريسبشن ده،, انت مين وحياة ابوك؟
الصوت: وحياة ابوك؟؟؟؟؟؟؟ انت فاكر نفسك شغال فى الطاحونة يا بنى
اتحرك تعالى على الريسبشششششششششششن
انا: طيب انا جاى اهو

وطبعا بوادر الذكاء اشتغلت قولت اكلم حضرة المامور اللى استلمنى الصبح ده واقوله اروح فين واعمل ايه

انا: اسامة انت سامعنى
ششششششششششششششششش
انا: يا اسامة
ششششششششششششششششش
بس عمال يقولى لما تحب تلكمنى ناديلى فى الجهاز
هاتلاقينى بقولك شبيك لبيك (وعاملى فيها عفريت العلبة)
انت يا عم المشهور يا اللى اسمك اسامة
يا اسااااااااااااااااااااااماااااااااااااااااا جزرررررررررررررررررررررر
هاهاهاهاهاهاهاهاهاهاهاهاهاهاهاها. (كل ده فى الجهاز طبعا)

الصوت اياه: انت يا بنى ادم انت بتعمل ايه وازاى تتكلم فى الجهاز بالطريقة دى تعالالى حالا فى الريسبشااااااااااااااااااااااااااااااااااااااااااان

المهم سيبت مكانى واتجهت للفندق من الوجهة الامامية
ولقيت الاخ (براكاش) لسه واقف زى ما هو زى ما يكون فى حد اداله بنطة لحام فى الارض
أنا: براكاش حبيب قلبى انت لسه واقف يا عفريت
(ولا عبرنى بصراحة)
أنا: انت يا عم التمثال!!!!!!!!!!!! فين الريسبشن ده؟؟
براكاش: حبيبى انت شنو يبى؟
انا: اهلااااااااااااااااااااااااااا انت كمان من فئة شنو دى الله يحرقكم انتم وشنو فى يوم واحد فين الريسبشن يااااااااااااااااااااله
براكاش: هادا ريسبشن (وهو بيشاور على الباب اللى وراه)
انا: طيب ما انت بتتكلم وحلو اهو امال مدبس بقك ليه يا عم بقرة كاش
براكاش: شنو
انا: اخرسسسسسسسسسسسسسسس

خبطت على الباب بكل رقة
طقطقطقطقطقط طقطقطقطقطقطقطق

صوت: ادخل
فتحت الباب ودخلت لقيت بسم الله ما شاء الله مكتب فخم وقاعد عليه شاب زى الفل حليوة وابيضانى كده ولابس بدلة وشكله ابن ناس يعنى (مكنتش اعرف اللى فيها لسه)
انا: سلامو عليكم
- وعليكم السلام وبصراحة لمحت ابتسامة صفرا بس مشغلتش بالى بيها
انا: حضرتك اللى كلمتنى على البتاع ده يا فندم؟
الكابتن الابيضانى: ايوة،,, انت ايه اللى انت عملته ده؟؟؟
انا: انا عملت ايه وبدات اعرق واحنا فى عز الشتا وكالعادة فتحت بقى ورفعت حواجبى (انسان غريب اوى انا)
ابو بدلة: انت قاعدلى على حجر زى اللى هايبيع فجل على الصبح كده
انا: فجل؟؟ ههههههههه اهو اى حاجة ما الايد البطالة نجسة هههههههههه (بروش معاه بقه) هو حضرتك شوفتنى ازاى؟؟؟؟؟؟؟؟؟؟؟ - بله مع عته مع نظرات غباء صرف -
الاخ الحليوة: فى الكاميرات يا ابو دم خفيف
انا: اااااااااااااااااه طب اقعد فين حضرتك ما انا جيت اقعد على الكرسى وقعت وكان ضهرى هايتكسر
الاخ الحليوة: والله مش شغلى خليك واقف زى زمايلك اتفضل يلا
بصيتله بصة كان نفسى تكون رصاص وبفتح الباب وخارج لقيته بيقولى
وايه اللى انت لابسه ده بس نياهاهاهاهاهاهاهاهاها
(الله يخرب بيتك يا سلامة يا ابو كرش الله يفضحك قادر يا كريم)

خرجت وانا ببرطم ولقيت الاخ براكاش بيضحك ومبسوط اوى
قولتله انت كمان واقف تلمع اكر يا اسطى حتى انتم كمان فيكم الداء ده
فين المخلوق اللى اسمه اسامة ده يا بنى

براكاش: شنو؟؟؟
انا: وكل عفاريت الدنيا بتتنطط فى وشى
عليا النعمة اللى هايقول شنو دى تانى هاديلو باللى فى رجلى
فين اسامة بقولككككككككككككككك
براكاش: اسامة فى داخل اوفيس
رحت على مكتب الامن ولقيت الافندى اللى اسمه اسامة قاعد وفطسان على نفسه من الضحك انا كنت عمال اجزززززز على سنانى من الغيظ

انا: انت بتضحك على ايه يا هم الكوميديان ها قولى ما هى ناقصاك
اسامة: اصل انت بصراحة كان شكلك حلو اوى وانت بتتشقلب من على الكرسى
انا: والله تحب اعملهالك كمان مرة دا على اعتبار انى شغال فى السيرك بقه يا عم مروض القرود انت
اسامة: اهدى بس وقولى مالك راكبك عفريت ليه
انا: يا عم انا مش فاهم اى حاجة
انا كل الى عملته انى لما وقعت من على الكرسى قعدت على حجر فى الخرابة اللى انت رميتنى فيها الصبح ومشيت دى وبعدين انا برضه مش فاهم ازاى هافضل واقف 12 ساعة يعنى؟؟ دا لو انا شغال بالجاز هاجى على نص اليوم وهاشحرررر
اسامة: معلش بكرة تتعود - لا حول ولا قوة الا بالله -
انا: تانى لا حول ولا قوة الا بالله يا عم متحسسنيش انى اتعميت على سهوة الله يخليك
اسامة: هاهاهاهاهااهاه والله انت شكلك كده ما هاتعمر فيها بسبب لسانك ده
انا: ماشى يا عمو الحكيم - دلوقتى انا هاعمل ايه بقه هافضل واقف زى ما افندينا ده بيقول كده
اسامة: اولا وطى صوتك عشان الواد ده مؤذى ورخم وبعدين متقلقش هو بيمشى الساعة 2 الضهر ولما يجى الاستاذ عادل كله هايتظبط
انا: مين عادل ده كمان والاخ بتاع الفجل اللى مرزى هناك ده اسمه ايه؟؟
اسامة: اللى هناك ده اسمه تامر تنك وواطى ورخم ومؤذى وكاره نفسه كمان
وعادل ده زميله مدير الريسبشن برضه بس على العكس بقه مصرى جدع على حق ويخدمك فى اى حاجة وهو ده اللى بصراحة الجدع اللى هنا وهاتشوف لما ييجى
انا: خلاص يا عم انا هاعيط من كتر التاثير اللى انا فيه
حسستنى ان عادل ده هاينزل علينا من السما ببراشوط ولابس ابيض فى ابيض - عموما انا عاوز اقولك على حاجة
اسامة: قول بقه واخلص عشان البوابة لوحدها بقالها نص ساعة
انا: يعنى هايجى حرامى يفكها ويشيلها على كتفه ويجرى يا اسامة بس بقولك كنت عاوز اقولك حاجة
اسامة: قوووووووووووووووووول وخلصنى
انا: كان يوم اسود يوم ما فكرت اجى هنا

مشيت من المكتب وانا الغيظ هايخلينى افرقع وماشى عمال اجز على سنانى وببرطم والغريبة ان كل اللى يقابلنى عملا يبصلى ويضحك
كله من البراشوط (برضه الله يخرب بيتك يا سلامة يا ابو كرش)

وفضلت مستنى لحد ما الساعة تيجى 2 عشان اشوف (عادل) اللى اسامة بيقول عليه ده هايعمل ايه هو كمان
ما هو الظاهر انى جاى البلد دى اصعب على الناس

ومكنتش عارف ان (عادل) ده بقه هايبقى من اهم الشخصيات اللى هاقبلها فى غربتى المنحوسة دى
مواقف وطرائف بجد، مغامرات ولا الافلام العربى

يتبع

منحوس في الغربة ... جزء 8

~*¤®§(*§(الجزء الثامن) §*)§®¤*~
~*¤®§(*§(عادل)§*)§®¤*~

معايا يا هيثم؟؟؟
دا كان الصوت الغريب اللى طالع من اللاسلكى اللى انا معلقه فى البنطلون
اللى انا حاسس انه من تقله هايخد بنطلون السندباد اللى انا لابسه ويقع
وكان سيادة اللواء اسامة ابو الحمد بينادى عليا زى ما بيكون بينادى على عيل تايه

انا: (وانا بجز على سنانى عشان خضنى) نعم يا عم عاوز ايه؟؟؟؟
اسامة: تعالى عند البوابة الامامية
انا: ليه هو انا بقه هافضل مقضيها مشاوير؟؟
اسامة: وهو بيصرخ (كان هايطلعلى من الجهاز) تعالى هناااااااااااااااااااااااااا
انا: طيب هاتنيل واجى اهو

روحت وانا عمال ابرطم
لقيت الاخ اسامة واقف عند البوابة الامامية للفندق
ومعاه الاخ فجلة الشهير بـ(مستر تامر المبوز)
ومعاهم واحد تالت برضه شكله ابن ناس اوى كده
ببدلة شيك كده ووشه مبتسم وباين على وشه انه جدع ومحدش يسالنى ليه انا حسيت كده
المهم روحت

انا: سلامو عليكم
اسامة افندى: وعليكم - وهو لاوى بوزه -
مستر فجلة: هز راسه بس
الاخ التالت: وعليكم السلام ورحمة الله وبركاته
وراح باصص لفجلة ابو وش بلاستيك وساله: هو ده؟؟ وهو بيبتسم
مستر فجلة: اه (وهو بيبتسم بس ابتسامة صفرا شبهه بالظبط)
اسامة: بيكلم الاخ التالت دا هيثم يا مستر عادل ولسه اول يوم النهاردة
انا: ايه ده هو حضرتك مستر عادل؟؟؟
(وانا مبسوط لان ده معناه ان ابو وش جبس اللى اسمه تامر هايختفى)
ازيك يا فندم انا فعلا لسه اول يوم النهاردة هنا بس والله سمعت عن حضرتك كلام زى الفل
وعرفت ان حضرتك احسن من ناس كتييير اوى (دا بكل براءة)
طبعا كان فى واحد واقف هايطرشق من جنابه
و (اسامة) طبعا فجاة لقى نفسه بيكتشف العالم من حواليه
وبيبص فى السما ومركز معاها اوى
عشان عينه متجيش فى عين (تامر) اللى كان هايقلب على انبوبة بوتجاز وهو واقف
ضحك (عادل) اوى وفهم الموضوع وقالى طب تعالى معايا جوه الريسبشن
دخلنا المكتب وبدا التعارف التقليدى
وطبعا مات على نفسه من الضحك لما قولتله ان انا كنت فاكر ان انا جاى اشتغل فى مكتب الاستقبال

و طبعا كان لازم يعلق على اليونيفورم العجيب اياه
واتكلمنا سوا كتيييييييييير اوى
وفهمت منه الشغل المطلوب بالظبط وطبعا مش هانسى ابدا انه هدى اعصابى كتيييييييير جدا بكلامه
وان اللى حصل ده نصيب وو وو
ووعدنى انه هايساعدنى لو جت قدامه اى فرصه للمساعدة
وبجد كان اول واحد مصرى اقابله جدع وراجل ويتقال عليه مصرى ابن بلد صحيح
وبدا بعرفنى على الاستف بتاع الفتدق بقه

قالى فى هنا فى الريسبشن ولد عامل اسمه (بابـو) هندى
انا: اسمه ايه تانى حضرتك؟؟
عادل: (بابـو) هو كده خلقة ربنا مش هانعترض
استنى هاوريهولك
انا: وعلى ايه توريهولى دا كفاية اسمه
عادل: لاوالنبى لازم تشوف(بابـو)
متخفش دا اليف
يا بابوووووووووووووووووو

وطلع من جوه الريسبشن الاخ (بابـو)
ويا ريتو ما طلع
حاجة كده يتقال عليه هندى بجد بشنبه الغريب وودانه اللى المدلدلة
وطريقة كلامه اللى تفطس من الضحك
وكل ما تقوله عل حاجة مردش بيهز راسه يمين وشمال بس
عامل كده زى ما يكون متبرمح
عادل: (بابـو) هذا هيثم سيكيورتى جديد
بابـو:
عادل: يا بابـو انا بقولك هيثم مصرى نفس بلاد انا جديد اليوم
انت متنح كده ليه هو انا بوريك ديناصور جاى من مصر يا بابـو
سلم عليه يا بابـو متخافش هو هايغسل ايده بعد كده
انا: لا وحياة والدك
اصرفه والنبى يا مستر عادل
عادل: لا والله لازم يسلم دا انا بقالى سنة بعلمه ازاى يتكلم زى اهل الارض
يا عاااااااااااااااااااااااااادل
عاااااااااااااااااااااااااااااااااااااادل
انا: تقريبا الاستاذ تامر بينادى عليك يا استاذ عادل
عادل: انت سمعت حاجة؟؟؟
انا: لاء - وانا فهمت انه بينفض للاخ (فجلة)
عادل: طيب خلينا فى موضوعنا
انت قابلت مستر (بوبى) يا هيثم؟؟
انا: مستر مين حضرتك؟؟ وانا مستغرب الاسم اوى
عادل: هو انا بقه كل ما اقولك على اسم هاتقولى مين؟؟
انت وقعت على وداناك وانت صغير يا ابنى
انا: اصل انت بتقول (بوبى) وانا اخر مرة سمعت فيها بوبى دى كان مش بيتقال له مستر
كانت بتتقال كنوع من انواع الشتيمة
عادل: اهو ربنا كرمه وبوبى بقه مدير بعد ما كان فى مصر بديل وودان طويلة
هنا مدير واقرع خد بالك يعنى
حرص منه عشان قرعته دى لما بتسخن بيعمل حاجات غريبة
انا: ااااااااااااه دا اللى بسموه اقرع ونزهى هههههههههههههههههه
يا عااااااااااااااااااااااادل انا ماشى يا ابنى
انا: اظن المرة دى محدش برضه بينادى عليك
عادل: انت سمعت حاجة تانى؟؟
انا: ولا الهوا سيادتك
عادل: يبقى نكمل كلام
خد بالك بقه ان بوبى ده بيعز المصريين اوىىىىى
انا: مممممم حتى البوبى كمان احنا مش عاجبينه صبرنا يا رب
عادل: طب انت شوفت (براين - ابو اكتاف -)؟؟
ولو قولتلى مين وبرقتلى هاديك بالشلوت
انا: انا مش هاقولك مين ولا هابرقلك ولا حاجة
بس هاقولك هو اسم (ابو اكتاف) ده اسم والده ولا اسم العيلة؟؟
عادل: لاء دا انت شكلك كده هاتعمر معايا
وشكلنا هانعمل شغل كويس سوا
انا: شغل ايه بالظبط اللى حضرتك بتتكلم عنه يا استاذ عادل
عادل: خليك فى حالك
انا:
عادل: هههههههههههههههههههه
هاتعرف كل حاجة فى وقتها متستعجلش
مش انت جيت هنا فى (فندق رفاد بالاس)
دا انت اكيد كنت مزعل مامتك اوىىىىىىىى
انا: ومن الواضح ان زعلها جاب نتيجة
طب ممكن اسال عن حاجة بس من غير حساسيات لو تسمحلى
عادل: اسال يا لمض
انا: هو تامر قصدى يعنى استاذ تامر عشان لو تبع الحكومة ولا حاجة
عادل: خلصصصصصصصص انا مبحبش المقدماااااااااااااااااااااااااااااااااااات
انا: طيب طيب انت هاتضرب ولا ايه
انا اقصد اقول يعنى ان تامر كان عامل حادثة فى وشه ولا حاجة؟
عادل: اشمعنى وايه السؤال الغريب ده؟؟
انا: اصل من ساعة ما جيت وانا شايفه مجبس وشه
وحسسنى انه لو ضحك الجبس ده هايقع
عادل: لاء الموضوع ابسط من كده بكتييير
هو بس فاهم الدنيا غلط
انا: طيب اصل انا بس شوفت منه مقابلة لظيظة شويتين
خلتنى بصراحة حاسس انى عاوز احضنه
بس وانا لابس حزام ناسف
عادل: يا راجل كبر دماغك هو لو معملش كده كان هايحس بتغير فى شخصيته
يرضيك الراجل يحس بكده
انا: لاء ميصحش طبعا مش مشكلة دمى انا يتحرق
هيا جت عليه يعنى
عادل: بص بقعه يا عم هيثم انا هاقولك على كلمتين من النهاية
عشان تبقى على نور من اولها
هنا اوعى تتعشم فى حد الا الله سبحانه وتعالى وبس
ولا تقول ده مصرى ولا ده ابن بلدى
انا: طيب ليه كده يا استاذ عادل؟؟
عادل: والله انت لما تقابل وتتعامل مع الناس هاتشوف بنفسك
انا مش بخوفك بس حبيت اوضحلك وبرضه مش عاوز اقفلها فى وشك من اول يوم
بس صدقنى زى ما فيه الوحش هاتقابل ناس كويسين
انا: طبعا اكيد والدليل انى قابلت سيادتك
عادل: مش معايا فكة
انا: ههههههههههههههه ماشى يا عمنا مقبولة
ولوقتى انا عاوز اقول لحضرتك على حاجة مهمة جدا
عادل: قوووووول
انا: انا مقعدتش من الصبح وحاسس ان رجلى هيا والجزمة حتة واحدة
ممكن نجيب كرسى واحطه عند البوابة الخلفية؟؟؟
عادل: وهو مين قالك انك هاتفضل عند البوابة الخلفية على طول
انا: طب اشطة اوى يعنى افرااااااااااااااااااااااااج
عادل: ايوة هاتبدلوا كلكم سوا مع بعض
محدش احسن من حد وانت شكلك كده فعلا عاجبنى
انا: طب ممكن طلب تانى لو سمحت؟؟؟
عادل: مش عارف ليه حاسس انى هاكرشك بعد 3 ثوانى
انا: طب قبل ما تكرشنى
ممكن يعنى......

اروح

اصفرررررررررررررررررررررررر

عادل: برااااااااااااااااااااااااااااااااااااااااااااااااااااااااااااااااااه

يتبع